Hen ten kori khai(Story Part-I)

 


ꠄꠇ ꠛꠦꠐꠣꠞ ꠀꠍꠟꠅ ꠄꠇ ꠙꠥꠞꠤ। ꠅꠘꠦ ꠙꠥꠞꠤ ꠛꠤꠀ ꠖꠤꠍꠁꠘ। ꠔꠣꠘ ꠎꠣꠉꠣ ꠡꠝ꠆ꠙꠖ ꠛꠣꠇ꠆ꠇꠣ ꠀꠍꠤꠟ। ꠔ ꠙꠥꠞꠤꠞ ꠊꠞꠅꠞ ꠘꠣꠔꠤ ꠄꠇꠎꠘ ꠡꠚꠤꠇ ꠀꠟꠤꠞ ꠟꠣꠈꠣꠘ ꠝꠘꠦ ꠇꠞꠅ ꠡꠚꠤꠇ ꠀꠟꠤ ꠅꠃ ꠄꠛꠟꠣ ꠔꠦ ꠛꠦꠐꠣꠞ ꠙꠥꠞꠤꠉꠥ ꠝꠞꠤ ꠉꠦꠍꠦ। ꠘꠣꠔꠤ ꠕꠁꠀ ꠅꠘꠦ ꠘꠣꠔꠤ ꠔ ꠅꠁ ꠉꠦꠍꠁꠘ ꠛꠦꠇꠣꠝꠣ ꠇꠥꠘꠥ ꠇꠣꠎ ꠇꠞꠝ ꠘꠣꠁ। ꠉꠥꠞꠣꠁꠘ ꠀꠞ ꠈꠣꠁꠘ ꠅꠘꠦ ꠇꠤꠔꠣ ꠇꠞꠛꠣ ꠔꠣꠁꠘ ꠇꠥꠘꠥ ꠛꠦꠛꠡꠣ ꠛꠣꠘꠤꠎꠅ ꠇꠤꠌ꠆ꠍꠥ ꠇꠞꠔꠦ ꠢꠣꠞꠁꠘ ꠘꠣ। ꠉꠦꠍꠦ ꠘꠣꠘꠣ ꠛꠣꠠꠤ ꠉꠤꠀ ꠘꠣꠘꠤꠞꠦ ꠇꠁꠍꠁꠘ ꠎꠦ ꠘꠣꠘꠤ ꠄꠈꠣꠘ ꠇꠣꠝ ꠇꠞꠃꠇꠣ ꠀꠝꠣꠞ ꠝꠣꠞꠔꠅ ꠡꠝ꠆ꠙꠖ ꠙꠣꠁ ꠘꠣꠘꠤ ? ꠄꠇꠎꠦꠞꠣꠔꠣ ꠛꠦꠌꠤꠀ ꠀꠝꠣꠞꠦ ꠇꠥꠘꠥ ꠛꠣꠄ ꠖꠦꠅ ꠀꠞ ꠘꠣꠄ ꠄꠇꠐꠣ ꠖꠥꠇꠣꠘ ꠃꠇꠣꠘ ꠖꠤꠀ। ꠅꠘꠦ ꠘꠣꠘꠤꠄ ꠇꠁꠘ ꠘꠣꠞꠦ ꠜꠣꠁ  ꠁ ꠇꠤꠔꠣ ꠇꠍ ꠀꠝꠣꠞ ꠙꠥꠞꠤ ꠘꠣꠁ ꠅꠘꠦ ꠔꠥꠁ ꠘꠣꠔꠤ ꠔꠞꠦ ꠁꠔꠣ ꠖꠤꠀ ꠇꠤꠔꠣ ꠅꠁꠔ ꠁꠔꠣ ꠃꠔꠣ ꠖꠤꠔꠣꠝ ꠙꠣꠞꠔꠣꠝ ꠘꠣꠄ। ꠁꠔꠣ ꠖꠤꠀ ꠇꠥꠘꠥ ꠟꠣꠜ ꠅꠁꠔꠅ ꠘꠣꠄ ꠀꠝꠞꠣ ꠛꠥꠠꠣ ꠛꠥꠠꠤ ꠀꠍꠤ ꠔꠦ ꠀꠝꠞꠣꠞ ꠙꠥꠀꠁꠘ ꠘꠣꠁ ꠁꠔꠣ ꠛꠦꠌꠤꠀ ꠔ ꠀꠝꠞꠣ ꠈꠣꠁꠔꠣꠝ ꠅꠁꠛꠅ। ꠛꠥꠟꠦ ꠢꠣꠍꠣ ꠖꠤꠔꠣꠄ ꠘꠣꠘꠤ ? ꠛꠥꠟꠦ ꠘꠣ ! ꠛꠥꠟꠦ ꠄꠈꠣꠘꠅ ꠀꠝꠤ ꠌꠣꠇꠞꠤ ꠗꠞꠍꠤꠉꠅ ꠘꠣꠘꠤ ꠛꠥꠟꠦꠞꠦ ꠜꠣꠁ ꠌꠣꠇꠞꠤꠞ ꠘꠣꠝ ꠇꠤꠔꠣ ?

ꠛꠥꠟꠦ ꠀꠝꠤ ꠢꠦꠘꠔꠦꠘ ꠇꠞꠤꠀ ꠈꠣꠁ ꠛꠥꠟꠦ ꠢꠦꠘꠔꠦꠘ ꠇꠞꠤꠀ ꠈꠣꠃ ꠘꠤ? ꠛꠥꠟꠦ ꠅꠄ! ꠛꠥꠟꠦ ꠘꠣꠘꠤ ꠀꠝꠤ ꠛꠥꠟꠦꠞꠦ ꠜꠣꠁ ꠁ ꠌꠣꠇꠞꠤꠐꠣ ꠇꠤꠔꠣ ꠇꠥꠘ ꠎꠣꠉꠣꠔ? ꠛꠥꠟꠦ ꠡꠤꠟꠦꠐ ꠕꠣꠇꠤ, ꠛꠥꠟꠦ ꠐꠤꠇ ꠀꠍꠦ ꠢꠦꠘꠔꠦꠘ ꠇꠞꠤꠀ ꠈꠣꠍꠔꠦ ꠀꠝꠞꠣꠞꠦ ꠘꠤꠀ ꠖꠦꠈꠣꠁꠍ। ꠛꠥꠟꠦ ꠀꠁꠌ꠆ꠍꠣ ꠘꠣꠘꠤ ꠖꠦꠈꠛꠣ ꠘꠦ ꠅꠘꠦ ꠟꠁꠀ ꠉꠦꠍꠦ ꠖꠦꠈꠛꠣꠞ ꠖꠣꠘꠤ ꠇꠁꠍꠦ ꠘꠣꠘꠣ ꠕꠣꠈꠛꠣ ꠡꠥꠗꠥ ꠈꠣꠟꠤ ꠘꠣꠘꠤ ꠎꠣꠁꠛꠣ । ꠅꠘꠦ ꠢꠦ ꠇꠤꠔꠣ ꠇꠞꠍꠦ ꠞꠤꠇꠡꠣ ꠌꠣꠟꠣꠄ ꠞꠤꠇꠡꠣ ꠌꠣꠞꠣꠁꠀ ꠇꠅꠇꠐꠣ ꠇꠣꠙꠠ ꠛꠣꠘꠣꠁꠍꠦ ꠀꠞꠇꠤꠟ ꠙꠥꠡꠣꠇ ꠜꠣꠟꠣ ꠀꠞ ꠄꠇꠐꠣ ꠇꠥꠐꠣ ꠛꠣꠠꠣ ꠞꠣꠈꠍꠦ ꠍꠥꠐꠅ ꠝꠥꠐꠅ ꠀꠞ ꠍꠥꠐꠅ ꠍꠥꠐꠅ ꠒꠦꠉ ꠛꠣꠡꠘ ꠕꠥꠞꠣ ꠅꠘꠦ ꠇꠁꠍꠦ ꠘꠣꠘꠤ ꠔꠥꠝꠤ ꠞꠣꠘꠖꠤꠀ ꠖꠤꠛꠣꠄ ꠀꠞ ꠀꠝꠤ ꠈꠣꠁꠝꠥ। ꠛꠥꠟꠦꠞꠦ ꠜꠣꠁ ꠔꠥꠁ ꠛꠤꠀ-ꠃꠀ ꠇꠞꠔꠦ ꠘꠣꠄ ꠘꠤ? ꠛꠥꠟꠦ ꠘꠣꠘꠤ ꠔꠥꠝꠤ ꠀꠁꠌ꠆ꠍꠅ ꠄꠛꠟꠣ ꠛꠤꠀ ꠇꠞꠤꠟꠣꠁꠝꠥ ꠅꠡꠥꠛꠤꠗꠣ ꠘꠣꠁ।

ꠅꠘꠦ ꠛꠥꠟꠦ ꠇꠁꠟꠦꠘꠥ ꠇꠤꠔꠣ ꠇꠞꠍ ꠢꠦꠘꠔꠦꠘ ꠇꠞꠍ ꠛꠥꠟꠦ ꠘꠣꠘꠤ ꠢꠦꠘꠔꠦꠘ ꠇꠞꠝꠥ ꠔꠥꠝꠤ ꠖꠦꠈꠛꠣꠄ। ꠅꠘꠦ ꠢꠦ ꠔ ꠞꠤꠇꠡꠣ ꠌꠣꠟꠣꠄ ꠀꠞ ꠞꠤꠇꠡꠣꠞ ꠇꠣꠙꠠ ꠛꠣꠠꠣ ꠕꠁꠀ ꠘꠣꠘꠤꠞ ꠡꠣꠝꠘꠦ ꠀꠉꠟꠍ ꠡꠥꠐꠇꠥꠐ ꠟꠣꠉꠣꠁꠀ ꠀꠁꠅꠄ ꠎꠦ 3\4 ꠐꠣ ꠒꠦꠞꠦꠍ ꠛꠣꠘꠣꠁꠍꠦ। ꠅꠘꠦ ꠄꠇꠖꠤꠘ ꠇꠄ ꠘꠣꠘꠤ! ꠛꠥꠟꠦ ꠇꠤꠔꠣ? ꠛꠥꠟꠦ ꠘꠣꠘꠣ ꠔ ꠝꠞꠤ ꠉꠦꠍꠁꠘ ꠛꠥꠟꠦ ꠁ ꠇꠤꠔꠣ ꠇꠍꠞꠦ ꠜꠣꠁ। ꠛꠥꠟꠦ ꠁꠀ ꠀꠣꠟ꠆ꠟꠣꠉꠅ ꠘꠣꠘꠤ ꠘꠣꠘꠣ ꠝꠞꠍꠁꠘ  ꠄꠇ ꠞꠣꠁꠔꠦ ꠒꠣꠁꠞꠤꠀ ꠅꠁꠍꠦ ꠀꠞ ꠅꠁꠀ ꠘꠣꠘꠣ ꠡꠦꠡ ꠝꠞꠤ ꠉꠦꠍꠁꠘ ꠀꠞ ꠁꠔꠣ ꠎꠦꠘ ꠞꠦꠝꠣꠞ ꠁꠔꠣ ꠛꠦꠝꠣꠞꠉꠅ ꠘꠣꠘꠤ ꠘꠣꠝ ꠟꠁꠟꠦ ꠀꠉꠦ ꠝꠣꠘꠡꠦ ꠒꠞꠣꠁꠔꠅ। ꠅꠄ ꠅꠄ ꠅꠘꠇꠥ ꠉ ꠘꠣꠘꠤ ꠔꠥꠝꠤ ꠉꠦꠟꠦ ꠇꠤꠎꠣꠘꠤ ꠔꠥꠝꠣꠞ ꠢꠣꠍꠞꠤ ꠎꠣꠄ । ꠄꠞꠖꠣꠄ ꠔꠥꠝꠤ ꠕꠣꠇꠅ ꠀꠝꠣꠞ ꠉꠦꠍꠦ ꠘꠣꠘꠣ ꠝꠞꠍꠁꠘ ꠝꠞꠤ ꠎꠣꠅꠇꠣ ।

 ꠛꠥꠟꠦ ꠁꠀ ꠀꠟ꠆ꠟꠣꠞꠦ ꠜꠣꠁ ꠎꠣꠉꠣ ꠡꠝ꠆ꠙꠖ ꠛꠥꠟꠦ ꠀꠝꠤ ꠀꠍꠤ ꠀꠞ ꠔꠥꠝꠤ ꠀꠍꠅ ꠅꠡꠥꠛꠤꠗꠣ ꠇꠤꠔꠣ? ꠘꠣꠘꠣ ꠝꠞꠤ ꠉꠦꠍꠁꠘ ꠛꠥꠟꠦꠞꠦ ꠜꠣꠁ ꠔꠦ ꠄꠇ ꠇꠣꠝ ꠇꠞ ꠕꠥꠞꠣ ꠘꠣꠄ ꠛꠦꠌꠤꠀ ꠀꠘ ꠛꠥꠟꠦ ꠘꠣꠘꠤ ꠙꠞꠦ ꠛꠦꠌꠝꠥꠘꠦ ꠌꠤꠘ꠆ꠔꠣ ꠇꠞꠤꠅ ꠘꠣ । ꠔꠥꠝꠣꠞꠦ ꠄꠈꠣꠘ ꠛꠤꠀ ꠖꠤꠟꠣꠁꠝꠥ ꠛꠥꠟꠦ ꠁ ꠇꠤꠔꠣ ꠇꠍ ? ꠔꠥꠁ ꠛꠤꠀ ꠇꠞꠔꠦ ꠛꠥꠟꠦꠉꠅ ꠘꠣꠘꠤ ꠄꠇꠎꠦꠐ ꠘꠣꠘꠣꠞ ꠟꠣꠈꠣꠘ ꠅꠃ, ꠅꠃ ꠛꠖꠟꠣ ꠘꠣꠘꠣ ꠔꠥꠝꠤ ꠎꠥꠖꠤꠘ ꠝꠣꠘꠅ ꠔꠦ ꠛꠤꠀ ꠄꠈꠣꠘ ꠖꠤꠟꠣꠁꠝꠥ । ꠛꠥꠟꠦ ꠔꠞ ꠘꠣꠘꠣꠞ ꠡꠤꠘ꠆ꠘꠤ ꠃꠘ꠆ꠘꠤ? ꠛꠟꠦ ꠁꠔꠣ ꠀꠝꠤ ꠝꠣꠘꠥꠡꠖꠤ ꠇꠞꠣꠁꠍꠤ ꠌꠤꠘ꠆ꠔꠣ ꠇꠞꠤꠅ ꠘꠣ। ꠛꠥꠟꠦ ꠔꠦ ꠀꠁꠌ꠆ꠍꠣ। ꠅꠘꠦ ꠇꠁꠍꠦ ꠔꠦ ꠅꠇꠘꠇꠥ ꠇꠤꠔꠣ ꠇꠞꠞꠦ ꠞꠦ ꠜꠣꠁ ꠀꠝꠣꠞ ꠛꠣꠠꠤ ꠊꠞ ꠛꠥꠟꠦ ꠡꠛꠔꠣ ꠖꠦꠇꠤꠀꠞ।

ꠛꠥꠟꠦꠞꠦ ꠜꠣꠁ ꠀꠝꠣꠞꠦ ꠟꠁꠀ ꠀꠄ ꠛꠣꠠꠤꠔ ꠛꠥꠟꠦ ꠁ ꠎꠦ ꠞꠣꠡ꠆ꠔꠣ ꠛꠣꠄ ꠢꠣꠝꠣꠁꠍꠤꠉꠅ ꠘꠣꠘꠤ ꠅꠇꠘꠇꠥ ꠔꠥꠇꠣꠁꠀ ꠛꠣꠞꠘꠤ ꠛꠠꠅ ꠇꠡ꠆ꠐ ꠀꠍꠦ ꠔꠦ ꠔꠥꠝꠣꠞꠦ ꠟꠁꠀ ꠎꠣꠁꠔꠦ ꠅꠁꠟꠦ ꠇꠅꠇꠖꠤꠘ ꠙꠞꠦ ꠎꠣꠁꠝꠥ। ꠄꠇꠎꠣꠞꠣ ꠐꠦꠇꠣ ꠙꠄꠡꠣ ꠞꠥꠎꠤ ꠇꠞꠤ ꠟꠣꠁ ꠀꠞ ꠘꠣꠘꠣꠞ ꠉꠤꠀ ꠛꠠꠅ ꠇꠞꠤ ꠡꠤꠘ꠆ꠘꠤ ꠇꠞꠝꠥ ꠀꠞ ꠔꠥꠝꠣꠞ ꠟꠣꠉꠤ ꠄꠇ ꠎꠣꠝꠣꠁ ꠔꠥꠇꠣꠁꠞꠣꠝ ꠘꠣꠘꠣꠞ ꠟꠣꠇꠣꠘ ꠅꠟꠣ ꠛꠖꠟꠣ ꠘꠣꠘꠣ ꠅꠄ ꠔꠦ ꠔꠥꠝꠣꠞꠦ ꠛꠤꠀ ꠖꠤꠞꠣꠁꠝꠥ। ꠅꠘꠦ ꠉꠦꠍꠦ ꠘꠣꠘꠣ ꠛꠣꠠꠤ ꠘꠣꠘꠣꠞ ꠟꠣꠉꠤ ꠀꠘꠉꠥꠞ ꠀꠙꠦꠟ ꠡꠛꠔꠣ ꠘꠤꠍꠁꠘ ꠘꠤꠀ ꠇꠁꠍꠁꠘ ꠘꠣꠘꠣ ꠄꠈꠣꠘ ꠇꠕꠣ ꠇꠁ ꠉꠣꠟꠤꠄꠘꠣ ꠎꠥꠖꠤꠘ?

ꠛꠥꠟꠦꠞꠦ ꠜꠣꠁ ꠇ ꠛꠥꠟꠦ ꠘꠣꠘꠣ ꠘꠣꠘꠤꠔ ꠝꠞꠤ ꠉꠦꠍꠁꠘ ꠀꠁꠎ 3 ꠖꠤꠘ ꠀꠉꠦ। ꠛꠥꠟꠦꠞꠦ ꠜꠣꠁ ꠁ ꠇꠤꠔꠣ ꠇꠍ ꠀꠝꠣꠞꠦ ꠔꠞ ꠘꠣꠘꠤ ꠝꠞꠍꠦ ꠀꠞ ꠀꠝꠞꠣꠞ ꠎꠤꠛꠘꠞ ꠎꠥꠞ ꠔꠥꠁ ꠀꠝꠣꠞꠦ ꠇꠁꠟꠦ ꠘꠣ। ꠛꠥꠟꠦ ꠀꠞ ꠌꠤꠘ꠆ꠔꠣ ꠇꠞꠤꠅ ꠘꠣ ꠘꠣꠘꠣ ꠔꠥꠝꠣꠞꠦ ꠄꠈꠣꠘ ꠛꠤꠀ ꠇꠞꠣꠁ ꠟꠣꠁꠝꠥ। ꠛꠥꠟꠦ ꠇꠤꠟꠣ ꠛꠤꠀ ꠇꠞꠣꠁꠛꠦꠞꠦ ꠜꠣꠁ ꠔꠞ ꠘꠣꠘꠤꠞꠦ ꠀꠝꠣꠞꠦ ꠖꠦꠇꠣꠁꠟꠦ ꠘꠣ। ꠛꠥꠟꠦ ꠄꠇꠛꠣꠞꠦ ꠛꠖꠟꠣ ꠘꠣꠘꠤ ꠅꠄ ꠡꠤꠖꠣ ꠘꠣꠘꠤꠅꠄ ꠀꠘꠤꠀ ꠖꠤꠝꠥ ꠔꠥꠝꠣꠞ ꠟꠣꠉꠤ ꠔ ꠘꠣꠘꠣ ꠌꠤꠘ꠆ꠔꠣ ꠇꠞꠤꠅ ꠘꠣ । ꠅꠘꠦ ꠔꠥꠝꠣꠞꠦ ꠎꠥꠖꠤꠘ ꠛꠤꠀ ꠇꠞꠣꠁꠔꠣꠝ ꠅꠄ ꠔꠦ ꠎꠣꠉꠣ ꠄꠇ ꠔꠤꠀꠞ ꠛꠦꠌꠅ। ꠛꠥꠟꠦꠞꠦ ꠜꠣꠁ ꠅꠘꠇꠥ ꠔꠥꠁ ꠀꠞ ꠀꠝꠤ ꠔꠥꠁ ꠎꠦꠇꠐꠣ ꠇꠞꠛꠦ ꠔꠞ ꠘꠣꠘꠤ ꠔ ꠘꠣꠁ ꠅꠘꠇꠥ ꠀꠝꠤ ꠝꠣꠘꠤ ꠔꠥꠁ ꠛꠦꠌꠤꠞꠣꠞꠦ ꠜꠣꠁ ꠄꠇ ꠇꠤꠀꠞ ।

ꠅꠘꠦ ꠛꠦꠌꠍꠦ ꠎꠣꠉꠣ ꠘꠣꠘꠣꠄ ꠔ ꠞꠦꠎꠦꠡ꠆ꠐꠣꠞꠤ ꠇꠞꠤ ꠖꠤꠟꠣꠁꠍꠁꠘ ꠘꠣꠘꠤ ꠘꠣꠁ ꠅꠘꠦ ꠘꠣꠘꠣꠞꠦ ꠛꠤꠀ ꠇꠞꠣꠁꠔꠣ ꠅꠘꠦ ꠎꠣꠉꠣ ꠞꠤꠄꠡꠐꠣꠞꠤ ꠇꠞꠤ ꠖꠤꠟꠣꠁꠍꠁꠘ ꠛꠦꠌꠤꠟꠤꠍꠁꠘ ꠛꠦꠌꠤꠀ ꠔ ꠔꠣꠞ ꠑꠦꠈꠣ ꠙꠣꠁꠍꠦ ꠔꠣꠞ ꠛꠤꠖꠦꠡꠞ ꠙꠕ ꠇꠞꠤꠟꠣꠁꠍꠦ। ꠇꠞꠤꠀ ꠇꠁꠟꠅ ꠘꠣꠘꠣ ꠄꠇ ꠎꠣꠉꠣꠔ ꠎꠣꠁꠔꠦ ꠅꠁꠛꠣꠄ ꠇꠤꠘ꠆ꠔꠥ ꠇꠁꠘ꠆ꠘꠣꠞ ꠝꠥꠈ ꠖꠦꠈꠛꠣꠄ ꠔꠥꠝꠣꠞ ꠛꠣꠠꠤꠔ ꠀꠘꠤꠀ ꠢꠣꠞꠟꠦ ꠇꠁꠟꠅ ꠑꠤꠇ ꠀꠍꠦ। ꠀꠁꠌ꠆ꠍꠣꠞꠦ ꠜꠣꠁ ꠛꠥꠟꠦ ꠘꠣꠘꠣ ꠔꠥꠝꠤ ꠛꠤꠀꠞ ꠛꠣꠎꠣꠞ ꠔ ꠁꠔꠣ ꠎꠣꠉꠣ ꠀꠞꠅ ꠀꠖꠇꠤꠀꠞ ꠛꠦꠌꠣ ꠟꠣꠉꠛꠅ। ꠛꠥꠟꠦ ꠇꠦꠘꠦꠛꠦ ꠛꠥꠟꠦ ꠔꠥꠝꠤ ꠛꠥꠠꠣ ꠝꠣꠘꠥꠡ ꠘꠄꠀ ꠛꠤꠀ ꠇꠞꠔꠣꠄ ꠔꠦꠔꠅ ꠅꠘꠇꠥ ꠛꠦꠡꠤ ꠑꠦꠈꠣ ꠙꠁꠡꠣ ꠟꠣꠉꠛ ।